壮族民歌音乐网络社区

江菊芳:精刁麻~伢嚓古 (短篇说唱山歌小戏)(第一集)

原创山歌2018-10-15 15:28:02
原创山歌
 原  创  客  家  山  歌     
 传  播  客  家  文  化  

本文作者

本人姓江名菊芳,(江姐)老家郭田布美乡,自小山歌涯喜爱,返老还童登歌场,登上歌场心惊慌!

登上歌场心惊慌,不知如何开言张,已离艺台几十载,肚中早己无墨藏,涯会慢慢跟等上!



精刁麻~伢嚓古
(短篇说唱山歌小戏)

作者/清唱:江姐


人物简介:

女~精刁麻

男~伢嚓古

时间!当代

地点!凤凰村


(第一集)

幕后(众合唱)

精刁伢嚓戏开场,

前因后果看分详,

彼此都系嚣心在,

各有目的各心藏!


心里藏啊路蹈蹈,

各有目的各有招,

你想同佢借角米,

佢想你哩吃只朝!


开幕!

今日上山割鲁箕,

唔知赖里放畚箕,

好久唔曾到此地,

觉得陌生又好奇!


觉得陌生又好奇,

四处青山团团围,

走到山顶往下看,

深山高岭立立岖!


唉!四处观望真系心旷神怡呀!

自古道,!

山歌唔唱心唔开,

大路唔行生溜台,

真系呀,久冇来山割鲁箕,

都唔知生疏有几多啊?

所以啊,涯今边唱山歌边割鲁箕,

一举两得,话唔定那还有第三收获,也就系一箭三鸟哦!哈哈哈!


唉呀里,话都盲讲完,感觉对面山有好像有动情?唔知

系声音回绕还系对面有人?

干脆再唱几首山歌试试,,,??


对面山上有动情,

阳光照射看唔清,

但愿乌云来遮日,

畀涯看清鬼啊人?


系人就爱应一声,

莫来吓涯着一惊,

鲁箕盲曾来割到,

边割边听面括青!


边割边听面括青,

唔知对面脉介声,

唔知系龙还系凤,

越听越惊眼越盯!


越听越惊眼越盯,

对面有影米八零,

或许靓仔高个子,

做涯情郎真真啱!

(讲)唉呀!如果佢真系好人,就莫错失良机

呀!再看看,,,


男(说)岸奇,岸久冇上山捡柴,今日刚上到半岭就听到有岸靓的山歌声?好预兆啊,唔管系老还系嫩,涯也山歌溜溜佢哟!

如果系靓妹呀就嘁佢嫁奔涯!!哈哈哈!


隔远听到山歌声,

人貌唔知有几靓?

若系靓妹讲实话,

报出汝介真姓名!


真名实姓话涯知,

等下涯就去寻你,

若系阿妹中涯意,

暗脯就做涯娇妻!


暗脯就做涯娇妻,

百万家财交畀你,

日里齐侪双双出,

夜晚齐侪共张被!

(说)

喂!请问对面唱歌的呀,

系赖里人?来山上做脉介呀?

倒柴还系割鲁箕或者寻帅哥呀!


女(说)唉呀!对面山上真系有人?

不过,就盲知佢脉介来路呀!

涯也山歌试试看?

对面介只岸了刁,

山中凤凰你敢嘹,

名姓盲曾问清楚,

胡说八道唠唠叨!


胡说八道唠唠叨,

心焦忧虑放风骚,

要想知得涯名姓,

齐侪山歌来过招!


过招就象称扭掂,

称下正知平唔平,

如果你系歌秧子,

就爱拜涯做先生!

(说)

喂,对面介人那,山歌过招,敢唔敢?

姣唔姣,,,?


(说)姣就姣,谁怕谁啊,?

说快板!

对面阿妹得人恼,

问佢名姓山歌姣,

人又唔知丑呀靓,

敢来上山称英嚎,

还怕佢系蛇精妖!


唔管系人还系妖,

边走边看细心瞄,

瞄瞄身高有米七,

咁样妹子可以交!

天赐良机乐逍遥!


逍遥自在快乐多,

呀嚓今后有老婆,

呀嚓今后勤耕作,

再也冇人话涯傻,

笨鸟也畏成天鹅!

哈哈哈!哈哈哈!


(说)唉呀里,看来里只死傻货,

唔系岸好搞呀!,,,

女(说)快板!

对面介只有嚣心,

山歌肓对偷看人,

肓知系人还系鬼,

唔好轻易畀佢寻,

慢慢邀佢正系真!


慢慢邀佢正系真,

躲在树下好遮阴,

涯也偷偷看呀到,

米八高度帅哥身,

身强体健人精灵!


身强体健人精灵,

梦中情人天降临,

若系帅哥冇嫌弃,

做涯情郎好开心,

上门女婿转家庭!


女(说)唉呀,难道真系缘分??


哈哈哈!(唱)

涯今来话阿妹知,

虽然隔远瞄见你,

白白嫩嫩涯想娶,

娶回阿妹床上陪!


陪涯生只胖哇哇,

到时状金有得拿,

年年同涯生一只,

百岁老人笑脱牙!


男(说)好唔好?


女(说)看样子,佢呀像系死猪瓜,好风流啊!

唔像正人君子啊,一定小心!


大家听下哩,还怪呀!看涯白嫩佢就想娶?

涯还唔知你系真心还系假意,自古话,“知人知面唔知心,”况且,素不相识,等下慢慢搞清楚,胸有成竹心定堂,假如系花花公子,岸样介人冇用,都系口是心非介,反过来想下,焦叶蒸板唔使怕,骂下佢又何防?再辽下佢,看佢样般,,,?

激将法,气死佢,,,


冇谷落秧系假精,

强盗念经假好人,

牛皮做伞难遮日,

自家三餐米难寻!


自家三餐米难寻,

桔子刻像真桔人,

发痣甘蔗你矛绞,

水底捞月枉费心!


枉费心来苦重重,

火炙鼻公面畏红,

胡里唔知尾巴臭,

敢话同你生孩童!


男(说)唉呀里,激将法,涯也晓,


烂屋上灰假面光,

或许你系臭婆娘,

背襄挽鼓惹人打,

打倒你畏一身伤!


打倒你畏一身伤,

单脚老鼠难上梁,

半生半死难度日,

半壁开窗爱醒光!


男(说)喂!你莫假精刀假厉害,火烧鸡毛矛试头,,,你呀真系猪肉上砧惹刀切呀!


女(说)看起来呀唔好再激了,否则,真系石灰撒路打白行,羊肉冇吃到,倒惹一身臊啊!

既然刚才都话姣山歌,涯就简单出几条山歌迷,让他猜猜?其实,畀佢台阶下,顺便再试下,水有几深,山有几高?如果真系唔错介话,正好让佢可过来见面谈,,,大家话,,啱唔啱?


观众说,‘啱,’


喂!都话山歌过招介,现在姣吗?


男(说)姣山歌可以,你千祺莫再骂人,有点素质正好!


女(说)好呀,只系想出几条简单的山歌迷让你猜猜?


男(说)可以,猜山歌涯最拿手,谁怕谁?莫废话岸多,请出题,

不过,有言在先,猜得对,你就答应做涯老婆?否则,唔猜?,,,


女(说)好,冇问题,只要你中涯意,,,


(请听下回分解!)

江姐(菊芳)编辑

2018年3月8日


作者联盟
名家专辑

排行榜

榜上有名

叶罗青

江远华

刘友

卢玉瑯

古君让

张雄涛

吴广解

张标

廖影秋

江菊芳

九哥

赖友丽

余乃立

甘柏堂

张领华

何源

张展望

江菊芳

廖国雄

曾素香

李平安

邹均辉

张雄

一键关注

黄杏妹

排行榜

邀您加盟

榜上有名


扫码一键投稿
编辑:游走天路  小萌
微信:xiaozhongyizhan01
邮箱:361112078@qq.com

Copyright © 壮族民歌音乐网络社区@2017